సమీక్ష : హిట్ 3 –మెప్పించే వైల్డ్ యాక్షన్ డ్రామా !

విడుదల తేదీ : మే 01, 2025

123తెలుగు.కామ్ రేటింగ్ : 3.25/5

నటీనటులు : నాని, శ్రీనిథి శెట్టి, రావు రమేష్, సూర్య శ్రీనివాస్, శ్రీనాథ్ మాగంటి తదితరులు
దర్శకుడు : డా. శైలేష్ కొలను
నిర్మాణం: నాని, ప్రశాంతి త్రిపురనేని
సంగీతం : మిక్కీ జే మేయర్
సినిమాటోగ్రఫీ : సాను జాన్ వర్గేసే
ఎడిటర్ : కార్తిక శ్రీనివాస్
సంబంధిత లింక్స్ : ట్రైలర్ 

నాని హీరోగా శైలేష్ కొలను తెరకెక్కించిన యాక్షన్ ఎంటర్‌టైనర్ హిట్ 3. కాగా భారీ అంచనాల నడుమ ఈ సినిమా ఈ రోజు థియేటర్లలో విడుదలైంది. ఈ చిత్రం ఎలా ఉందో సమీక్ష లోకి వెళ్ళి చూద్దాం.

కథ:

అర్జున్ సర్కార్ (నాని) ఒక రూత్ లెస్ ఎస్.పీ, చిన్న తనంలోనే అమ్మను కోల్పోవడంతో రఫ్ అండ్ టఫ్ గా పెరుగుతాడు. ఫిల్టర్ లేకుండా మాట్లాడుతూ ఉంటాడు. ఇక సొసైటీలో ఒక్క క్రిమినల్ కూడా బతక్కూడదు అనుకునే పోలీస్. తన చేతికి దొరికిన క్రిమినల్స్‌కు నరకం చూపిస్తుంటాడు అర్జున్. అలాంటి అర్జున్ కి సి.టీ.కే అనే డార్క్ వెబ్ సైట్ గురించి తెలుస్తోంది. ఆ సైట్ ద్వారా సైకో కిల్లర్స్ అంతా వరుసగా హత్యలు చేస్తూ పోలీసులకు సవాల్ విసురుతుంటారు. అలాంటి కేసులోకి అర్జున్ సర్కార్ సైకో కిల్లర్ గా వస్తాడు. ఈ మధ్యలో మృదుల (శ్రీనిథి శెట్టి)తో ప్రేమలో పడతాడు. అసలు మృదుల ఎవరు?, ఆమె ఎందుకు అర్జున్ సర్కార్ లైఫ్ లోకి వస్తోంది ?, ఇంతకీ, ఆ డార్క్ వెబ్ సైట్ రన్ చేస్తున్న సైకో కిల్లర్ ఎవరు ?, అతడి మోటో ఏంటి ?, చివరకు ఆ కిల్లర్స్ ను అర్జున్ సర్కార్ ఎలా అంతం చేశాడు ? అనేది మిగిలిన కథ.

ప్లస్ పాయింట్స్ :

ఎప్పటిలాగే, అర్జున్ సర్కారుగా తన పాత్రలో నాని అద్భుతంగా నటించాడు. కీలక సన్నివేశాల్లో నాని అభినయం మొత్తం సినిమాకే మెయిన్ హైలైట్. నాని నుంచి ఆయన అభిమానులు ఎలాంటి సినిమా కోరుకుంటున్నారో, ఈ సినిమా అలాగే భారీ విజువల్స్ మరియు ‘వైల్డ్ యాక్షన్ అండ్ ఎమోషనల్ ఎలిమెంట్స్’ తో సాగింది. ఇక వాటికి తగ్గట్టుగానే తన పాత్రలో డిఫరెంట్ వేరియేషన్స్ చూపిస్తూ, తన పవర్ ఫుల్ పెర్ఫార్మెన్స్ తో నాని ప్రేక్షకులను మెస్మరైజ్ చేశారు.’హిట్ 3’తో తెలుగు తెరకు నేరుగా పరిచయం అయిన శ్రీనిధి శెట్టి తన పాత్రలో ఒదిగిపోయారు. కొన్ని కీలక సన్నివేశాల్లో ఆమె నటన చాలా బాగుంది. అలాగే, ఆమె స్రీన్ ప్రెజెన్సీ కూడా బాగుంది.

ఇతర కీలక పాత్రల్లో కనిపించిన రావు రమేష్, శ్రీనాథ్ మాగంటి ఆకట్టుకున్నారు. అదేవిధంగా అతిథి పాత్రలో నటించిన అడవి శేష్ తో పాటు మిగిలిన నటీనటులు కూడా అయా పాత్రల్లో తమ నటనతో మెప్పించారు. దర్శకుడు శైలేష్ కొలను మూవీకి అనుగుణంగానే ప్లేను నడుపుతూ నానిను కొత్తగా చూపించిన విధానం బాగుంది. ముఖ్యంగా సినిమాలో యాక్షన్ ఎలిమెంట్స్ ను మరియు బలమైన భావోద్వేగాలను, అలాగే డార్క్ టచ్ ను కూడా సమపాళ్లలో పెట్టడం సినిమాకి ప్లస్ అయింది. ముఖ్యంగా నాని పై యాక్షన్ సీక్వెన్స్‌ లను ఎఫెక్టివ్ గా డిజైన్‌ చేశారు. అదే విధంగా పాత్రల చిత్రీకరణతో పాటు ఆ పాత్రల నేపథ్యాన్ని కూడా పర్ఫెక్ట్ గా డిజైన్ చేశారు. సినిమా యాక్షన్ లవర్స్ కి బాగా నచ్చుతుంది.

మైనస్ పాయింట్స్ :

బరువైన ఎమోషన్స్ తో, భారీ విజువల్స్ తో వచ్చిన ఈ ‘హై యాక్షన్ ఎమోషనల్ ఎంటర్ టైనర్ ‘హిట్ 3’ చాలా వరకు బాగా ఆకట్టుకున్నా.. కథనం పరంగా వచ్చే కొన్ని సీన్స్ సినిమా స్థాయికి తగ్గట్లు పూర్తి స్థాయిలో ఆకట్టుకోవు. అలాగే సినిమాలో ఉన్నంత హైప్ ను సినిమా మొత్తం కంటిన్యూ చేయలేక పోయారు. ఇక నాని – హీరోయిన్ మధ్య లవ్ ట్రాక్ ఇంకా బెటర్ గా ఉండి ఉంటే బాగుండేది.

మొత్తానికి కథలో చెప్పాలనుకున్న మెయిన్ థీమ్ తో పాటు కీలక సన్నివేశాల్లో మంచి పనితీరుని కనబర్చిన దర్శకుడు డా. శైలేష్ కొలను, కొన్ని సన్నివేశాల్లో మాత్రం నెమ్మదిగా కనిపించారు. ముఖ్యంగా సెకండ్ హాఫ్ అంతా ఒక యాక్షన్ సీక్వెన్స్ చుట్టే తిరగడం బాగాలేదు.

సాంకేతిక విభాగం :

ఈ సినిమాకు సంబంధించి సాంకేతిక విభాగం గురించి మాట్లాడుకుంటే.. సినిమాటోగ్రాఫర్‌ సాను జాన్ వర్గేసే సినిమాటోగ్రఫీ వర్క్ అద్భుతంగా ఉంది. సినిమాలోని కీలక సన్నివేశాలతో పాటు మిగిలిన యాక్షన్ సన్నివేశాలను కూడా కథాకథనాలకు అనుగుణంగా అద్భుతంగా చిత్రీకరించారు. కార్తిక శ్రీనివాస్ ఎడిటింగ్ కూడా చాలా బాగుంది. ఇక సంగీత దర్శకుడు మిక్కీ జే మేయర్ సమకూర్చిన పాటలు చాలా బాగున్నాయి. వాటి పిక్చరైజేషన్ కూడా బాగుంది. నేపథ్య సంగీతం కూడా ఆకట్టుకుంది. డా. శైలేష్ కొలను రచయితగా దర్శకుడిగా ఈ చిత్రానికి పూర్తి న్యాయం చేశారు. మంచి కథ, బలమైన వైవిధ్యమైన పాత్రలతో చిత్రాన్ని ఆసక్తికరంగా తీర్చిదిద్దారు. కానీ, కొన్నిచోట్ల ఆయన కథనాన్ని ఇంకా ఆసక్తికరంగా మలిచి ఉంటే బాగుండేది. నిర్మాతలు నాని, ప్రశాంతి త్రిపురనేని ఎక్కడా కాంప్రమైజ్ కాకుండా ఈ చిత్రాన్ని నిర్మించారు. వారి నిర్మాణ విలువలు అద్భుతంగా ఉన్నాయి.

తీర్పు :

వైల్డ్ యాక్షన్ డ్రామాగా వచ్చిన ఈ ‘హిట్ 3’లో.. భారీ యాక్షన్ సీక్వెన్సెస్ తో పాటు ఫీల్ గుడ్ ఎమోషన్స్ కూడా చాలా బాగున్నాయి. ముఖ్యంగా నాని పవర్ ఫుల్ నటన, శైలేష్ దర్శకత్వం, మొత్తం సాంకేతిక విభాగం నుంచి అందిన మంచి పనితనం.. మొత్తం సినిమాకే ప్రత్యేక ఆకర్షణగా నిలిచాయి. కానీ, కొన్ని సన్నివేశాలు రోటీన్ గా సాగడం, స్క్రీన్ ప్లే రెగ్యులర్ గా సాగడం వంటి అంశాలు మైనస్ అయ్యాయి. ఐతే నాని తన నటనతో, తన వైల్డ్ పర్ఫామెన్స్ తో ఈ సినిమాని మరో లెవల్ కి తీసుకు వెళ్లారు. ఓవరాల్ గా ఈ చిత్రం నాని అభిమానులతో పాటు యాక్షన్ లవర్స్ ను కూడా అలరిస్తుంది.

123telugu.com Rating: 3.25/5

Reviewed by 123telugu Team 

Click Here for English Review